ఇన్స్టాగ్రామ్ పరిచయం.. ప్రేమ వ్యవహారంలో దారుణ హత్య: ముగ్గురు అరెస్ట్

సోషల్ మీడియా పరిచయాలు, టీనేజ్ ప్రేమ వ్యవహారాలు ఎంతటి విషాదాలకు దారితీస్తాయో కేరళలో జరిగిన ఓ దారుణ హత్య ఘటన మరోసారి నిరూపించింది. ఇన్స్టాగ్రామ్ ద్వారా పరిచయం పెంచుకుని ఓ యువకుడిని నిర్మానుష్య ప్రాంతానికి రప్పించి హత్య చేసిన ఘటన కేరళ రాజధాని తిరువనంతపురంలోని శ్రీకార్యం పరిధిలోని పాంగప్పారాలో కలకలం రేపింది. 17 ఏళ్ల ఎ.డి. అభిరామ్ను దారుణంగా హత్య చేసి, మృతదేహాన్ని గోనె సంచిలో కుక్కి అరటితోట సమీపంలోని నిర్మానుష్య ప్రదేశంలో పడేశారు.

ఆదివారం మధ్యాహ్నం సుమారు 3 గంటల సమయంలో అభిరామ్ స్నేహితులను కలవడానికి వెళ్తున్నానని ఇంట్లో చెప్పి బయటకు వెళ్లాడు. సాయంత్రం సుమారు 7 గంటల సమయంలో తండ్రికి ఫోన్ చేసి కొద్దిసేపట్లో ఇంటికి వస్తానని చెప్పాడు. ఆ తర్వాత అతడి ఫోన్ స్విచ్ఛాఫ్ కావడంతో కుటుంబ సభ్యులు ఆందోళన చెందారు. రాత్రి అయినా ఇంటికి తిరిగి రాకపోవడంతో శ్రీకార్యం పోలీసులను ఆశ్రయించి ఫిర్యాదు చేశారు.

ఇన్స్టాగ్రామ్ ఖాతా ద్వారా వల

పోలీసుల దర్యాప్తులో కీలక విషయాలు వెలుగులోకి వచ్చాయి. 17 ఏళ్ల ప్రధాన నిందితుడు తన స్నేహితురాలికి చెందిన ఇన్స్టాగ్రామ్ ఖాతా, ఫోన్ను ఉపయోగించి అభిరామ్తో మాట్లాడినట్లు గుర్తించారు. యువతి తనను కలవాలని కోరుతోందని భావించిన అభిరామ్ పాంగప్పారాలోని నిర్మానుష్య ప్రాంతానికి వెళ్లాడు. అక్కడికి చేరుకున్న తర్వాత అసలు విషయం తెలిసింది. నిందితుడు, అభిరామ్ ద్వారా తనకు నచ్చని మరో యువకుడిని అక్కడికి రప్పించాలని ప్రయత్నించాడు. అయితే ఆ యువకుడు అక్కడికి రాకపోవడంతో అభిరామ్కు, నిందితుడికి మధ్య తీవ్ర వాగ్వాదం జరిగింది.

తప్పించుకునే ప్రయత్నంలో హత్య

అభిరామ్ అక్కడి నుంచి వెళ్లేందుకు ప్రయత్నించగా, నిందితుడు అతడి తలపై రాయితో దాడి చేసి, బెల్టుతో గొంతు బిగించి హత్య చేసినట్లు పోలీసుల దర్యాప్తులో వెల్లడైంది. అనంతరం మృతదేహాన్ని గోనె సంచిలో కుక్కి, చేతులు కాళ్లు కట్టి అరటితోటలో పడేసినట్లు గుర్తించారు. ఈ ఘటనలో మరో నిందితుడైన ఉమర్ ముఫత్తర్ మృతదేహాన్ని తరలించి ఆధారాలు దాచిపెట్టేందుకు సహకరించినట్లు పోలీసులు అనుమానిస్తున్నారు.

ప్రేమలో విభేదాలు.. ప్రతీకారంతో హత్యకు పథకం

ప్రధాన నిందితుడికి గతంలో తన ప్రేయసితో విభేదాలు ఏర్పడ్డాయి. ఆమె మరో యువకుడితో ప్రేమలో ఉండటాన్ని తట్టుకోలేక, అతడిపై ప్రతీకారం తీర్చుకోవాలని నిందితుడు పథకం వేసినట్లు పోలీసులు భావిస్తున్నారు. ఆ యువకుడు అభిరామ్కు స్నేహితుడు కావడంతో అతడిని ఉపయోగించుకుని లక్ష్యంగా పెట్టుకున్న వ్యక్తిని అక్కడికి రప్పించాలని ప్రయత్నించినట్లు దర్యాప్తులో వెల్లడైంది. అనుకున్న వ్యక్తి రాకపోవడంతో అభిరామ్ ప్రాణాలు కోల్పోవాల్సి వచ్చింది.

ఈ కేసులో 17 ఏళ్ల బాలుడితో పాటు 18 ఏళ్ల అనంత, 21 ఏళ్ల ఉమర్ ముఫత్తర్ను పోలీసులు అరెస్ట్ చేశారు. ఉమర్పై గతంలోనూ పలు క్రిమినల్ కేసులు ఉన్నట్లు పోలీసుల విచారణలో వెల్లడైంది. పాంగప్పారాలో మృతదేహాన్ని గుర్తించిన పోలీసులు, ఫోన్ కాల్స్, ఇన్స్టాగ్రామ్ సందేశాలు, సీసీటీవీ దృశ్యాలను పరిశీలించి నిందితులను గుర్తించారు.