కొండారెడ్డిపల్లి గ్రామ సభ: ప్లాస్టిక్ నియంత్రణకు ప్రతిజ్ఞ, నీటి సంరక్షణకు ప్రాధాన్యత

గ్రామాభివృద్ధితో పాటు పర్యావరణ పరిరక్షణ, నీటి సంరక్షణ, ప్రజారోగ్యం, ఉపాధి అవకాశాలపై ప్రజల్లో అవగాహన కల్పించేలా కొండారెడ్డిపల్లి గ్రామంలో ప్రత్యేక గ్రామ సభ నిర్వహించారు. ఈ సభలో గ్రామ సర్పంచ్, ఉపసర్పంచ్, వార్డు సభ్యులు, సంబంధిత అధికారులు, వైద్యులు పాల్గొని పలు ముఖ్యమైన అంశాలపై ప్రజలకు సూచనలు చేశారు.

ప్లాస్టిక్కు స్వస్తి స్టీల్ గ్లాసులకు ప్రాధాన్యత

ప్లాస్టిక్ వినియోగాన్ని నియంత్రించేందుకు గ్రామ సభలో ప్రత్యేకంగా ప్రతిజ్ఞ చేయించారు. ముఖ్యంగా శుభకార్యాలు, ఇతర సామాజిక కార్యక్రమాల్లో ప్లాస్టిక్ గ్లాసులు, ప్లాస్టిక్ వస్తువులకు బదులుగా స్టీల్ గ్లాసులు, పునర్వినియోగించగల వస్తువులను వినియోగించాలని సూచించారు. ప్లాస్టిక్ వ్యర్థాల వల్ల పర్యావరణానికి, ప్రజల ఆరోగ్యానికి కలిగే నష్టాలను వివరించారు.

ఇంకుడు గుంతలకు ప్రాధాన్యత

వర్షపు నీటిని వృథాగా పోకుండా భూగర్భ జలాలను పెంచేందుకు ప్రతి ఇంటి వద్ద, అవసరమైన ప్రాంతాల్లో ఇంకుడు గుంతల ఏర్పాటుకు ప్రాధాన్యత ఇవ్వాలని నిర్ణయించారు. నీటి సంరక్షణలో ప్రతి కుటుంబం భాగస్వామ్యం కావాలని అధికారులు సూచించారు.

కొత్త జాబ్ కార్డులకు దరఖాస్తు చేసుకోవాలి

ఉపాధి హామీ పథకంలో కొత్తగా జాబ్ కార్డులు అవసరమైన కుటుంబాలు సంబంధిత అధికారులను సంప్రదించి దరఖాస్తు చేసుకోవాలని గ్రామ సభలో విజ్ఞప్తి చేశారు. అర్హులైన ప్రతి కుటుంబానికి ప్రభుత్వ ఉపాధి పథకాల ప్రయోజనాలు అందేలా చర్యలు తీసుకోవాలని సూచించారు.

ప్రస్తుతం నీటి వనరుల పరిరక్షణ అత్యంత ముఖ్యమని, తాగునీటితో పాటు అందుబాటులో ఉన్న ప్రతి నీటి వనరును జాగ్రత్తగా వినియోగించుకోవాలని సర్పంచ్, ఉపసర్పంచ్, వార్డు సభ్యులు, అధికారులు ప్రజలకు సూచించారు. అవసరం లేకుండా నీటిని వృథా చేయకుండా, భవిష్యత్ తరాల అవసరాలను దృష్టిలో పెట్టుకుని నీటిని పొదుపుగా వినియోగించాలని కోరారు.

గ్రామ సభలో వైద్యులు ఆభా () కార్డుపై ప్రజలకు అవగాహన కల్పించారు. ఆభా కార్డుపై ఉన్న అపోహలను తొలగించుకోవాలని, ఆరోగ్య సేవలకు సంబంధించిన డిజిటల్ ఆరోగ్య సమాచారాన్ని సద్వినియోగం చేసుకునేలా ప్రతి పౌరుడు అవగాహన పెంచుకోవాలని సూచించారు. కార్డు ప్రయోజనాలు, దాని వినియోగంపై ప్రజలకు వివరించారు.

గ్రామ అభివృద్ధి కేవలం ప్రభుత్వ శాఖల బాధ్యత మాత్రమే కాదని, ప్రజల భాగస్వామ్యంతోనే పరిశుభ్రమైన, ఆరోగ్యకరమైన, నీటి భద్రత కలిగిన గ్రామంగా కొండారెడ్డిపల్లిని తీర్చిదిద్దగలమని గ్రామ సభలో పాల్గొన్న ప్రజాప్రతినిధులు, అధికారులు పేర్కొన్నారు.