NTR/Vatsavai (ధర్మ రథం) జూలై 20
తెలంగాణ రక్షణ సేన (TRS) చీఫ్ కల్వకుంట్ల కవిత ఆధ్వర్యంలో కోరుట్లలో నిర్వహించిన ‘పాంచజన్య సంకల్ప సభ’లో ఆమె కాంగ్రెస్, బీజేపీ, బీఆర్ఎస్ ప్రభుత్వాల వైఫల్యాలను తీవ్రంగా విమర్శించారు. బీజేపీ సీనియర్ నేత డాక్టర్ రఘు తన అనుచరులతో కలిసి కవిత సమక్షంలో తెలంగాణ రక్షణ సేనలో చేరారు. ఈ సందర్భంగా కవిత పలు కీలక హామీలు కూడా ఇచ్చారు.
తెలంగాణ రక్షణ సేన (TRS) చీఫ్ కల్వకుంట్ల కవిత ఆధ్వర్యంలో కోరుట్లలో నిర్వహించిన ‘పాంచజన్య సంకల్ప సభ’ అట్టహాసంగా జరిగింది. ఈ సభలో బీజేపీ సీనియర్ నేత డాక్టర్ రఘు తన అనుచరులతో కలిసి కవిత సమక్షంలో తెలంగాణ రక్షణ సేనలో చేరారు. రఘు చేరికతో కోరుట్లలో తమ పార్టీకి వెయ్యి ఏనుగుల బలం వచ్చిందని కవిత సంతోషం వ్యక్తం చేశారు.
ఈ సందర్భంగా కవిత మాట్లాడుతూ, రాష్ట్రంలోని కాంగ్రెస్, బీజేపీ, బీఆర్ఎస్ పార్టీల వైఫల్యాలను ఎండగట్టారు. పేదల కోసం ఐదు కీలక అంశాలతో (ఉచిత విద్య, వైద్యం, యువతకు ప్రోత్సాహం, రైతులకు అండ, సామాజిక న్యాయం) తన రాజకీయ ప్రస్థానాన్ని మొదలుపెట్టినట్లు ఆమె ప్రకటించారు.
'సూపర్ ఎల్ నినో' ప్రభావం ఉంటుందని వాతావరణ నిపుణులు హెచ్చరించినా, ప్రభుత్వం ఏమాత్రం సోయి లేకుండా వ్యవహరిస్తోందని కవిత మండిపడ్డారు. గోదావరిలో 418 టీఎంసీల నిల్వ సామర్థ్యం ఉండగా, రేవంత్ రెడ్డి నిర్లక్ష్యం వల్ల కేవలం 93 టీఎంసీలు మాత్రమే ఉన్నాయని, దీనివల్ల సాగు, తాగునీటికి తీవ్ర ఇబ్బందులు ఎదురవుతున్నాయని ఆరోపించారు.
కాళేశ్వరం ప్రాజెక్ట్ విషయంలో బీఆర్ఎస్, కాంగ్రెస్ పార్టీలు అనవసర రాజకీయాలు చేస్తున్నాయని, మేడిగడ్డతో సంబంధం లేకుండా నీటిని ఎత్తిపోసే అవకాశం ఉన్నా ప్రభుత్వం ఆ దిశగా చర్యలు చేపట్టడం లేదని విమర్శించారు.
ఎన్నికల సమయంలో ఇచ్చిన హామీ మేరకు రైతులకు రెండు లక్షల రుణమాఫీ జరగలేదని, యూరియా కోసం రైతులను 'మీ సేవ' కేంద్రాల చుట్టూ తిప్పడం దారుణమని పేర్కొన్నారు. తమ ప్రభుత్వం వస్తే రైతులను రాజును చేస్తామని, ప్రభుత్వ కార్యాలయాల్లో రైతుల కోసం ప్రత్యేక కౌంటర్లు ఏర్పాటు చేస్తామని హామీ ఇచ్చారు.
బీఆర్ఎస్లో ఉన్నప్పుడు అవినీతి గురించి అంతర్గతంగా ప్రశ్నించానని, కానీ కొన్ని 'గుంటనక్కలు' ఓర్వలేక తనపై కుట్ర చేసి పార్టీ నుంచి పంపించేశాయని కవిత ఆరోపించారు. 20 ఏళ్ల పాటు పార్టీ కోసం కష్టపడితే చివరకు మోసం చేశారని ఆవేదన వ్యక్తం చేశారు. ఇకపై కంఠంలో ప్రాణం ఉన్నంత వరకు మళ్ళీ బీఆర్ఎస్ లోకి వెళ్లే ప్రసక్తే లేదని ఆమె స్పష్టం చేశారు.
ప్రభుత్వ పాఠశాలల దుస్థితి వల్ల పేదలు సైతం అప్పులు చేసి ప్రైవేట్ స్కూళ్లకు వెళ్లాల్సి వస్తోంది. అలాంటి వారి పిల్లల ఫీజులను ప్రభుత్వమే భరిస్తుంది. ఆరోగ్యశ్రీలో ఉన్న ఆంక్షలు తొలగించి, ఎంత పెద్ద జబ్బైనా ప్రభుత్వ ఖర్చుతోనే ఉచిత వైద్యం అందిస్తాం. యువత ఐడియాలను ప్రోత్సహిస్తూ, ఎలాంటి గ్యారంటీ లేకుండా రూ. 2 లక్షల నుంచి రూ. 20 కోట్ల వరకు రుణాలు అందిస్తాం. ప్రతి ప్రభుత్వ కార్యాలయంలో రైతులకు ప్రత్యేక కౌంటర్లు. ఎస్సీ, ఎస్టీ, బీసీ, మైనార్టీల కోసం ప్రత్యేక పోరాటం. ముఖ్యంగా ముస్లింల ఆర్థిక, రాజకీయ సాధికారతకు కృషి చేస్తాం.
