రాజమహేంద్రవరం గ్రామీణం, 2026-08-09
పోలీస్, రెవెన్యూ శాఖల పనితీరులో మార్పులు తీసుకురావాలని, పౌర హక్కుల పరిరక్షణకు ప్రభుత్వం ప్రత్యేక చర్యలు చేపట్టాలని రాష్ట్రీయ ప్రజా కాంగ్రెస్ (ఆర్పీసీ) అధ్యక్షులు మేడా శ్రీనివాస్ డిమాండ్ చేశారు. రాజమహేంద్రవరంలో జరిగిన పార్టీ సమావేశంలో ఆయన ఈ మేరకు పలు సూచనలు చేశారు.
పోలీస్, రెవెన్యూ శాఖల పనితీరులో మార్పులు తీసుకురావాలని, పౌర హక్కుల పరిరక్షణకు ప్రభుత్వం ప్రత్యేక చర్యలు చేపట్టాలని రాష్ట్రీయ ప్రజా కాంగ్రెస్ (ఆర్పీసీ) అధ్యక్షులు మేడా శ్రీనివాస్ డిమాండ్ చేశారు. రాజమహేంద్రవరంలోని ఆర్పీసీ ప్రధాన కార్యాలయంలో జరిగిన పార్టీ వారాంతపు సమావేశంలో ఆయన ముఖ్య అతిథిగా పాల్గొని మాట్లాడారు. రాష్ట్రంలో పోలీస్, రెవెన్యూ శాఖలపై ప్రజల్లో వ్యతిరేకత పెరుగుతోందని ఆయన ఆందోళన వ్యక్తం చేశారు. కొన్ని ఘటనల్లో ఫిర్యాదులకు సంబంధం లేని సెక్షన్లు నమోదు చేయడం, కేసుల తీవ్రతను ఇష్టానుసారం మార్చడం వల్ల బాధితులకు తీవ్ర అన్యాయం జరుగుతోందని ఆయన ఆరోపించారు.
ప్రతి పోలీస్ స్టేషన్కు న్యాయవాది
క్రిమినల్ కేసుల్లో కనీసం పదేళ్ల అనుభవం ఉన్న న్యాయవాదిని ప్రత్యేక అధికారాలతో ప్రతి పోలీస్ స్టేషన్కు నియమించాలని మేడా శ్రీనివాస్ కోరారు. దీనివల్ల నేర పరిశోధనలో తప్పిదాలు తగ్గి, కోర్టుల్లో కేసులు బలంగా నిలబడే అవకాశం ఉంటుందని ఆయన తెలిపారు. బాధితులకు సత్వర న్యాయం అందించడంలో ఈ నియామకం కీలక పాత్ర పోషిస్తుందని ఆయన అభిప్రాయపడ్డారు.
తహసీల్దార్ కార్యాలయాల్లో రెవెన్యూ పోలీస్ విభాగం
భూ రికార్డుల మార్పులు, ఆస్తి వివాదాలు, అధికార దుర్వినియోగం వంటి సమస్యలతో ప్రజలు తీవ్ర ఇబ్బందులు పడుతున్నారని మేడా శ్రీనివాస్ పేర్కొన్నారు. భూ హక్కుల పరిరక్షణ కోసం ప్రతి తహసీల్దార్ కార్యాలయంలో అంతర్గత రెవెన్యూ పోలీస్ విభాగాన్ని ఏర్పాటు చేయాలని ఆయన డిమాండ్ చేశారు. ఈ విభాగం ద్వారా భూ సంబంధిత వివాదాలు సత్వరమే పరిష్కారం అవుతాయని, ప్రజలకు న్యాయం అందుతుందని ఆయన ఆశాభావం వ్యక్తం చేశారు.
ప్రతి జిల్లాలో మానవ హక్కుల సంఘం
మానవ హక్కుల పరిరక్షణకు ప్రతి జిల్లా కేంద్రంలో ప్రత్యేక సంఘాన్ని ఏర్పాటు చేసి, బాధితులకు త్వరితగతిన న్యాయం అందేలా అధికారాలు కల్పించాలని మేడా శ్రీనివాస్ కోరారు. ప్రస్తుత వ్యవస్థలో బాధితుల ఫిర్యాదులు పరిష్కారం కాకుండా కాలయాపనకు గురవుతున్నాయని ఆయన విమర్శించారు. జిల్లా స్థాయిలో మానవ హక్కుల సంఘం ఏర్పాటు చేయడం ద్వారా బాధితుల సమస్యలపై తక్షణమే స్పందించి, న్యాయం జరిగేలా చూడవచ్చని ఆయన సూచించారు.
అవినీతి, అధికార దుర్వినియోగంపై చర్యలు
ప్రభుత్వ కార్యాలయాల్లో పౌర సేవలు అవినీతి, అధికార దుర్వినియోగానికి గురికాకుండా కఠిన చర్యలు తీసుకోవాలని ఆయన సూచించారు. చట్టబద్ధమైన పాలన కోసం రాజకీయ వ్యవస్థలో మార్పు రావాల్సిన అవసరం ఉందని, ప్రజలు నూతన రాజకీయ మార్పును కోరుకుంటున్నారని మేడా శ్రీనివాస్ పేర్కొన్నారు. సమర్థవంతమైన పాలన అందించడంలో ప్రభుత్వ యంత్రాంగం మరింత బాధ్యతాయుతంగా వ్యవహరించాలని ఆయన అభిప్రాయపడ్డారు.
