మునగాల మండల పరిధిలోని నేలమర్రి గ్రామానికి చెందిన రోడ్డు ప్రమాద బాధితుల కుటుంబాలను మాజీ ఎమ్మెల్యే మల్లయ్య యాదవ్ పరామర్శించారు. మరణించిన మంగయ్య దశదినకర్మ కార్యక్రమంలో పాల్గొని, గాయపడిన వెంకన్న ఆరోగ్య పరిస్థితిని అడిగి తెలుసుకున్నారు. అనంతరం వినాయక మండపాన్ని సందర్శించారు.
మునగాల మండల పరిధిలోని నేలమర్రి గ్రామానికి చెందిన జడిగల మంగయ్య మండల కేంద్రంలో జరిగిన రోడ్డు ప్రమాదంలో మరణించారు. బుధవారం నేలమర్రి గ్రామంలోని మంగయ్య నివాసంలో జరిగిన ఆయన దశదినకర్మ కార్యక్రమంలో మాజీ ఎమ్మెల్యే మల్లయ్య యాదవ్ పార్టీ నాయకులతో కలిసి పాల్గొన్నారు. మంగయ్య చిత్రపటానికి పూలమాలలు వేసి నివాళులర్పించి, కుటుంబ సభ్యులను ఓదార్చి, తీవ్ర సానుభూతిని, సంతాపాన్ని తెలియజేశారు. అదేవిధంగా, నేలమర్రి గ్రామానికి చెందిన గంగరబోయిన వెంకన్న రోడ్డు ప్రమాదంలో తీవ్రంగా గాయపడి, తన ఇంటి వద్ద వైద్యం చేయించుకుంటుండగా, మాజీ ఎమ్మెల్యే మల్లయ్య యాదవ్ పార్టీ నాయకులతో కలిసి పరామర్శించి, ఆరోగ్య పరిస్థితిని అడిగి తెలుసుకున్నారు. ఆయన త్వరగా కోలుకోవాలని ఆకాంక్షించారు.
నేలమర్రి గ్రామంలో గణపతి నవరాత్రి ఉత్సవాలలో భాగంగా ముత్యాలమ్మ యూత్ ఏర్పాటు చేసిన వినాయక మండపాన్ని మాజీ ఎమ్మెల్యే మల్లయ్య యాదవ్ సందర్శించారు. స్వామివారికి ప్రత్యేక పూజా కార్యక్రమాలు నిర్వహించి, ప్రజల సంక్షేమాన్ని కాంక్షించారు. ఈ కార్యక్రమంలో బిఆర్ఎస్ మండల పార్టీ అధ్యక్షుడు తొగరు రమేష్, నేల మర్రి గ్రామ సర్పంచ్ రాంపగు సుందరయ్య, మాజీ జెడ్పిటిసి కోళ్ల ఉపేందర్, నర్రా వెంకటరెడ్డి, లచ్చిరెడ్డి, గడ్డం లింగయ్య, ఎల్పి రామయ్య, కాపర్తి మణికంఠ కుమార్, పార్టీ నాయకులు, కార్యకర్తలు పాల్గొన్నారు.
