జగిత్యాల, 2026-11-21
శ్రీ భక్త మార్కండేయ యువజన స్వచ్ఛంద సేవా సమితి ఆధ్వర్యంలో నిరుపేద యువతి వివాహానికి రూ.15 వేల ఆర్థిక సాయం అందించారు. గత 15 ఏళ్లుగా నిరుపేదలకు అండగా నిలుస్తున్న శ్రీ భక్త మార్కండేయ యువజన స్వచ్ఛంద సేవా సమితి నిర్వహిస్తున్న సేవా కార్యక్రమాలు అభినందనీయమని జగిత్యాల జిల్లా మహిళా కాంగ్రెస్ అధ్యక్షురాలు అడువాల జ్యోతి లక్ష్మణ్ అన్నారు.
స్వామి వివేకానందుని స్ఫూర్తితో ఓదార్చే మాటల కన్నా సహాయం చేసే చేతులే మిన్న అనే నినాదంతో, శనివారం సమితి ఆధ్వర్యంలో రాయికల్ గ్రామానికి చెందిన గోసికొండ జమున-కిషన్ దంపతుల కుమార్తె వివాహానికి రూ.15 వేల ఆర్థిక సహాయం అందజేశారు. ఈ నెల 25న జరగనున్న వివాహం సందర్భంగా, ముఖ్య అతిథిగా హాజరైన జ్యోతి లక్ష్మణ్ దంపతుల చేతుల మీదుగా ఆర్థిక సహాయాన్ని అందించారు.
అలాగే, గీత సిల్క్ హౌస్ అధినేత కస్తూరి జగదీశ్వర్ కుమారుడు శశిధర్-లహరిక దంపతుల సహకారంతో వధువుకు కంచి పట్టు చీరను బహూకరించారు.
ఈ సందర్భంగా జ్యోతి లక్ష్మణ్ మాట్లాడుతూ.. సమితి గత 15 ఏళ్లుగా నిరుపేద కుటుంబాలకు వివాహాలు, విద్య, ఇతర అవసరాలతో పాటు ఆపద సమయంలోనూ ఆర్థిక సహాయం అందించడం గొప్ప విషయమని అన్నారు. సమాజ సేవలో భాగంగా ఇలాంటి కార్యక్రమాలకు తన వంతు సహకారం అందించడం సంతోషంగా ఉందని తెలిపారు. సేవా కార్యక్రమాలను కొనసాగిస్తున్న సమితి సభ్యులను అభినందించారు.
ఈ కార్యక్రమంలో కార్యనిర్వాహకులు ఆకుబత్తిని గౌరి శ్రీనివాస్, కొక్కుల సుదర్శన్, జోగ మల్లేశం, సంగీత శ్రీనివాస్, చెన్న రమేష్, మాచర్ల శంకర్, కొక్కుల శేఖర్, పొలాస శంకర్, బోగ రాజేశం, అలుసా రామప్రకాశ్, చిలుక రాజన్న, బోగ చిన్న గంగాధర్, తవుటూ రామచంద్రం, చెట్పెల్లి సుధాకర్, వీరభత్తిని అనిల్, సామల నటశేఖర్, సింగం గంగాధర్, నందగిరి నర్సయ్య, స్వర్గం వెంకటేశం తదితరులు పాల్గొన్నారు.







