కాలువల్లో నీళ్లున్నా ఎండుతున్న వరి పైర్లు.. సాగునీటి కోసం అన్నదాతల ఆవేదన

కాకతీయ కాలువ పరిధిలోని పలు ప్రాంతాల్లో వరి పంటలు నీటి కొరతతో ఎండిపోతున్నాయని రైతులు ఆవేదన వ్యక్తం చేస్తున్నారు. జూరాల, ఎస్సారెస్పీ, ఎల్ఎండీ వంటి జలాశయాల్లో నీటి లభ్యత ఉన్నప్పటికీ కాలువలకు సకాలంలో నీటిని విడుదల చేయకపోవడంతో సాగు చేసిన పంటలను కాపాడుకోవడం రైతులకు సవాల్గా మారిందని వారు చెబుతున్నారు. వర్షాలు ఆలస్యం కావడం, మరోవైపు కాలువల ద్వారా సాగునీరు అందకపోవడంతో ఇప్పటికే పెట్టుబడులు పెట్టిన రైతులు ఆందోళన చెందుతున్నారు. ముఖ్యంగా వరి పొలాలకు కీలక దశలో నీరు అందకపోతే పంట దిగుబడిపై తీవ్ర ప్రభావం పడే అవకాశం ఉందని రైతులు పేర్కొంటున్నారు.

బిఆర్ఎస్ పార్టీ యువ నాయకులు అల్లిపురపు జైపాల్ రెడ్డి మాట్లాడుతూ, పాలేరు నియోజకవర్గంలో కాలువ ద్వారా నీళ్లు పారుతున్నా డోర్నకల్ నియోజకవర్గంలో నీళ్లు రావడం లేదని, పాలేరుకు న్యాయం చేసి డోర్నకల్కు అన్యాయం చేయడం ఏంటని ప్రశ్నించారు. డోర్నకల్ ఎమ్మెల్యే ఉన్నట్టా లేనట్టా అని, ఆకేరు వాగు తెగి నీరు వృధాగా పోతున్నా పట్టించుకునేవారు లేరని ఆరోపించారు. జూరాల నుంచి నీటి విడుదల, కాకతీయ కాలువలకు సకాలంలో నీరు అందించే విషయంలో అధికారులు తక్షణ చర్యలు చేపట్టాలని రైతులు కోరుతున్నారు. జలాశయాల్లో అందుబాటులో ఉన్న నీటిని వ్యవసాయ అవసరాలకు వినియోగించేలా ప్రభుత్వం స్పష్టమైన కార్యాచరణ చేపట్టాలని డిమాండ్ చేస్తున్నారు.

నీటి కోసం రైతులు రోజుల తరబడి ఎదురుచూస్తున్నా సమస్య పరిష్కారం కాకపోవడంపై అసంతృప్తి వ్యక్తమవుతోంది. పంటలు ఎండిపోకముందే కాలువలకు నీటిని విడుదల చేసి రైతులను ఆదుకోవాలని అన్నదాతలు కోరుతున్నారు.