దేశ రాజధాని ఢిల్లీలో మహిళలు, చిన్నారులపై పెరుగుతున్న లైంగిక వేధింపులు, దాడులపై సుప్రీంకోర్టు తీవ్ర ఆగ్రహం వ్యక్తం చేసింది. నేరస్థుల్లో చస్తామనే భయం కలిగేలా పోలీసులు వ్యవహరించాలని ఆదేశించింది. రాత్రి వేళల్లోనూ మహిళలు భయం లేకుండా తిరిగే వాతావరణం కల్పించాలని స్పష్టం చేసింది.
దేశ రాజధాని ఢిల్లీలో మహిళలు, చిన్నారులపై వరుసగా జరుగుతున్న లైంగిక వేధింపులు, దాడులపై అత్యున్నత నాయస్థానం సుప్రీంకోర్టు తీవ్ర ఆగ్రహం వ్యక్తం చేసింది. మహిళపై చెయ్యి వేయాలన్నా, రేప్ చేయాలనే ఆలోచన వచ్చినా.. కచ్చితంగా చచ్చిపోతామన్న భయం నేరస్థుల మెదళ్లలో పుట్టించాలి అని ఢిల్లీ పోలీసులను ఆదేశించింది. ఢిల్లీలో రాత్రి 10 గంటల సమయంలో కూడా మహిళలు రోడ్లపై ఎలాంటి భయం లేకుండా స్వేచ్ఛగా నడిచేలా వాతావరణాన్ని తీసుకురావాలని సుప్రీంకోర్టు స్పష్టం చేసింది.
ఢిల్లీ-ఎన్సీఆర్ ప్రాంతంలో ఇటీవల మైనర్ బాలికపై స్లీపర్ బస్సులో జరిగిన దారుణమైన గ్యాంగ్రేప్ ఘటనతో పాటు ఇతర లైంగిక నేరాలపై సుప్రీంకోర్టు సుమోటోగా విచారణ చేపట్టింది. 2012 నాటి నిర్భయ ఘటనను గుర్తుచేస్తూ, ఇప్పటికీ ఇలాంటి ఘోరాలు జరగడం చట్టాన్ని అమలు చేసే యంత్రాంగం వైఫల్యమేనని ధర్మాసనం మండిపడింది. లైంగిక నేరాలకు పాల్పడే సంఘవిద్రోహ శక్తుల పట్ల పోలీసులు అత్యంత కఠినంగా ప్రవర్తించాలి. కళాశాలల వద్ద విద్యార్థినులను వేధించే ఆకతాయిలపై, అక్రమంగా నడుస్తున్న ఈటరీలు/మద్యం షాపులపై ప్రత్యేక దృష్టి సారించాలి. సాధారణ ప్రజలు ధైర్యంగా వచ్చి మాట్లాడేలా పోలీసుల ప్రతిస్పందన ఉండాలని, అదే సమయంలో నేరస్థులకు సింహస్వప్నంగా మారాలని సూచించింది.
మహిళల రాజ్యాంగబద్ధమైన జీవించే హక్కును, స్వేచ్ఛను కాపాడడం పోలీసు శాఖ బాధ్యత అని, కాగితాలపై ప్రణాళికలు రాయడం కాకుండా తక్షణమే ఆచరణాత్మక చర్యలకు దిగాలని ఢిల్లీ పోలీసు ఉన్నతాధికారులను కోర్టు ఆదేశించింది.
