రాజస్థాన్లోని ఝుంఝును జిల్లాలో ఘోర రోడ్డు ప్రమాదం జరిగింది. రోడ్డు నిర్మాణ పనులు చేస్తుండగా, మిక్సర్ యంత్రం హైటెన్షన్ విద్యుత్ తీగలకు తగలడంతో ఎనిమిది మంది కార్మికులు అక్కడికక్కడే మృతి చెందారు. మరో ఐదుగురు తీవ్రంగా గాయపడ్డారు.
ఈ దుర్ఘటన చాపోలి గ్రామంలో సోమవారం ఉదయం చోటుచేసుకుంది. చాపోలి నుంచి కడమ్కుండ్ ఆలయానికి వెళ్లే మార్గంలో గ్రామస్థులు రోడ్డు నిర్మాణ పనులు చేపడుతున్నారు. ఈ క్రమంలో సిమెంట్ మిక్సర్ యంత్రాన్ని తరలిస్తుండగా, దానికి అమర్చిన ఇనుప పైపు లేదా హైడ్రాలిక్ భాగం పైనున్న విద్యుత్ తీగకు తగిలింది. దీంతో యంత్రంలోకి విద్యుత్ ప్రవహించి, దాని వద్ద పనిచేస్తున్న కార్మికులు షాక్కు గురయ్యారు.
ప్రమాదంలో హరిరామ్ గుర్జర్ (30), మంగళ్చంద్ గుర్జర్ (22), కలూరామ్ గుర్జర్, పవన్ గుర్జర్ (23), విష్ణు సైనీ (38), సురేశ్ సైనీ (30), ముకేశ్ సైనీ (27), ఫతేచంద్ సైనీ (32) మృతి చెందారు. గాయపడిన వారిని వెంటనే సమీప ఆసుపత్రికి తరలించి చికిత్స అందిస్తున్నారు.
ప్రమాద సమాచారం అందిన వెంటనే జిల్లా కలెక్టర్, పోలీసు అధికారులు ఘటనా స్థలానికి చేరుకుని పరిస్థితిని సమీక్షించారు. రాజస్థాన్ ముఖ్యమంత్రి భజన్లాల్ శర్మ ఈ ఘటనపై తీవ్ర దిగ్భ్రాంతి వ్యక్తం చేశారు. ప్రమాదంపై ఉన్నతస్థాయి విచారణకు ఆదేశించిన ఆయన, గాయపడిన వారికి మెరుగైన వైద్యం అందించాలని అధికారులను ఆదేశించారు.
ప్రధాని నరేంద్ర మోదీ కూడా మృతుల కుటుంబాలకు ప్రగాఢ సంతాపం తెలిపారు. మృతుల కుటుంబాలకు ప్రధానమంత్రి జాతీయ సహాయ నిధి నుంచి ఒక్కొక్కరికి రూ. 2 లక్షలు, గాయపడిన వారికి రూ. 50 వేల చొప్పున పరిహారం ప్రకటించారు. ప్రమాదానికి గల కారణాలు, భద్రతా లోపాలపై అధికారులు లోతుగా దర్యాప్తు చేస్తున్నారు.
