నకిరేకల్ నియోజకవర్గం, నార్కెట్ పల్లి మండలం పరిధిలోని చెరువుగట్టు గ్రామ ప్రజలు, భక్తుల అవసరాల దృష్ట్యా అభివృద్ధి పనుల కోసం పార్టీ నాయకులు ఎమ్మెల్యే వేముల వీరేశంకు వినతి పత్రం అందించారు. రోడ్డు మరమ్మత్తులు, వీధి దీపాల ఏర్పాటు వంటి సమస్యలను వారు ఎమ్మెల్యే దృష్టికి తీసుకెళ్లారు.
26-10-2026న కంటి వెలుగు కార్యక్రమంలో భాగంగా చెరువుగట్టు గ్రామానికి విచ్చేసిన ఎమ్మెల్యే వేముల వీరేశంను, స్థానిక సర్పంచ్ నేతకాని కృష్ణయ్య, గ్రామ పంచాయతీ కార్యదర్శితో పాటు పార్టీ నాయకులు కలిసి దరఖాస్తు సమర్పించారు. ప్రజలు బాగుంటేనే ఊరు బాగుంటుంది అనే నినాదంతో ఈ విజ్ఞప్తి చేశారు. నందుల కమాన్ నుండి నల్ల చెరువు కట్ట వెంబడి, చెరువు కల్వర్టు గోల్ బావి వరకు ఉన్న రోడ్డు పరిస్థితి అత్యంత దయనీయంగా ఉందని నాయకులు తెలిపారు. రోడ్డు మొత్తం గుంతలమయంగా మారడంతో గ్రామ ప్రజలు, భక్తులు రాకపోకలకు తీవ్ర ఇబ్బందులు పడుతున్నారని, ద్విచక్ర వాహనదారులు కిందపడి ప్రమాదాలకు గురవుతున్నారని వివరించారు. రోడ్డు పక్కన ఉన్న వీధి దీపాలు గత 6-8 నెలలుగా పనిచేయడం లేదని, దీనివల్ల అమావాస్య రోజుల్లో కాలినడకన వెళ్లే భక్తులు విష సర్పాల బారిన పడే ప్రమాదం ఉందని ఆందోళన వ్యక్తం చేశారు. దేవస్థానం పరిసరాల్లో చెత్త వ్యర్థాలను రోడ్డు వెంబడి పారవేయడం వల్ల దుర్వాసనతో పాటు అనారోగ్య సమస్యలు తలెత్తుతున్నాయని పేర్కొన్నారు. తక్షణమే పేరుకుపోయిన చెత్తను తొలగించి, గుంతలమయంగా ఉన్న రోడ్డును, పనిచేయని వీధి దీపాలను మరమ్మత్తులు చేయాలని నాయకులు కోరారు. తద్వారా గ్రామ ప్రజలకు, భక్తులకు సౌకర్యవంతమైన ప్రయాణాన్ని కల్పించి, ప్రమాదాలను అరికట్టాలని విజ్ఞప్తి చేశారు. ఈ కార్యక్రమంలో కమ్మంపాటి వెంకటయ్య గౌడ్, గుంటి నరేష్, బాలంతో పాటు పలువురు నాయకులు, గ్రామస్తులు పాల్గొన్నారు.
