కల్పిత నాయకుడు పుస్తకంపై విచారణకు మాల మహానాడు విజ్ఞప్తి

డాక్టర్ బి.ఆర్. అంబేడ్కర్ వ్యక్తిత్వం, రాజకీయ జీవితం, రాజ్యాంగ నిర్మాణంలో ఆయన పాత్రపై అభ్యంతరకరమైన వ్యాఖ్యలు, తీవ్రమైన ఆరోపణలు ఉన్నాయని పేర్కొంటూ హమారా ప్రసాద్ రచించిన కల్పిత నాయకుడు పుస్తకంపై సమగ్ర విచారణ జరిపి, వాస్తవాలను నిర్ధారించాలని మధిర పట్టణ మాల మహానాడు కమిటీ కోరింది.

ఈ మేరకు మధిర పట్టణ మాల మహానాడు కమిటీ ప్రతినిధులు మధిర టౌన్ పోలీస్స్టేషన్లో స్టేషన్ హౌస్ ఆఫీసర్ ()ను కలిసి వినతిపత్రం సమర్పించారు. పుస్తకంలోని వివాదాస్పద అంశాలను పూర్తిగా పరిశీలించి, చారిత్రక ఆధారాలు, అధికారిక రికార్డుల ఆధారంగా వాస్తవాలను నిర్ధారించాలని వారు విజ్ఞప్తి చేశారు.

మాల మహానాడు ప్రతినిధులు మాట్లాడుతూ.. డాక్టర్ బి.ఆర్. అంబేడ్కర్పై విమర్శలను తాము వ్యతిరేకించడం లేదని, అయితే చారిత్రక వ్యక్తిపై తీవ్రమైన ఆరోపణలు చేసినప్పుడు వాటికి ఆధారాలు, ప్రామాణిక చారిత్రక పత్రాలు, సంబంధిత సందర్భాలు ఉండాల్సిన అవసరం ఉందని పేర్కొన్నారు. నినాదం కాదుడాక్యుమెంట్.. ఆరోపణ కాదుసాక్ష్యం.. కోట్ మాత్రమే కాదుసందర్భం కావాలి అని వారు స్పష్టం చేశారు.

పుస్తకంలోని వివాదాస్పద అంశాలపై దృష్టి

కల్పిత నాయకుడు పుస్తకంలోని డాక్టర్ బి.ఆర్. అంబేడ్కర్కు సంబంధించిన వివాదాస్పద అంశాలు, ఆరోపణలు, వ్యాఖ్యలను పూర్తిగా పరిశీలించాలని మాల మహానాడు కమిటీ కోరింది. రాజ్యాంగ నిర్మాణంలో డాక్టర్ అంబేడ్కర్ పాత్రను నిరాకరించే లేదా వక్రీకరించే వాదనలు ఉంటే.. రాజ్యాంగ సభ చర్చలు, అధికారిక రికార్డులు, రాజ్యాంగ ముసాయిదా కమిటీకి సంబంధించిన పత్రాలు తదితర ప్రాథమిక ఆధారాల ఆధారంగా వాటిని పరిశీలించాలని విజ్ఞప్తి చేశారు. అంబేడ్కర్ను అభ్యంతరకరమైన పదాలతో అభివర్ణించినట్లయితే.. ఆయా వ్యాఖ్యలకు రచయిత చూపిన ఆధారాలను కూడా అధికారులు పరిశీలించాలని కోరారు.

మధిరలో సామాజిక ఉద్రిక్తతలు రాకుండా చూడాలి

పుస్తకంలోని అంశాలు మధిర పట్టణంలో సామాజిక విభేదాలు, ఉద్రిక్తతలు లేదా అశాంతికి కారణమయ్యే పరిస్థితి ఉందా అనే అంశాన్ని కూడా పోలీసులు పరిశీలించాలని కమిటీ కోరింది. పుస్తకంలోని అభ్యంతరకర అంశాలకు సంబంధించిన పుస్తక ప్రతులు, సోషల్ మీడియా పోస్టులు, వీడియోలు, ఇతర డిజిటల్ ఆధారాలను అవసరమైతే పోలీసులకు అందజేయడానికి సిద్ధంగా ఉన్నట్లు తెలిపారు.

దర్యాప్తులో తేలితే చట్టపరమైన చర్యలు

భారత రాజ్యాంగం భావప్రకటన స్వేచ్ఛను కల్పిస్తూనే చట్టబద్ధమైన పరిమితులను కూడా నిర్దేశిస్తుందని మాల మహానాడు కమిటీ ప్రతినిధులు పేర్కొన్నారు. పుస్తకంలోని ప్రతి అంశాన్ని చట్టపరమైన ప్రమాణాలతో పరిశీలించి, చట్టవిరుద్ధమైన అంశాలు ఉన్నట్లు దర్యాప్తులో తేలితే వర్తించే చట్టాల ప్రకారం తగిన చర్యలు తీసుకోవాలని కోరారు. అవసరమైతే సంబంధిత చరిత్ర, రాజ్యాంగ నిపుణుల అభిప్రాయాలను తీసుకుని వాస్తవాలను నిర్ధారించాలని విజ్ఞప్తి చేశారు.