అయోధ్య రామమందిరానికి కొత్త సీఈవోగా జితేంద్ర మిశ్రా బాధ్యతలు స్వీకరణ

అయోధ్య శ్రీరామ జన్మభూమి తీర్థ క్షేత్ర ట్రస్ట్ నూతన సీఈవోగా నియమితులైన రిటైర్డ్ ఎయిర్ మార్షల్ జితేంద్ర మిశ్రా నేడు అధికారికంగా బాధ్యతలు స్వీకరించనున్నారు. ఆలయానికి వస్తున్న విరాళాల దుర్వినియోగంపై వస్తున్న ఆరోపణల నేపథ్యంలో, పరిపాలనలో పూర్తి పారదర్శకత తీసుకురావడానికి, భద్రతను కట్టుదిట్టం చేయడానికి, భక్తులకు మెరుగైన సౌకర్యాలు కల్పించడానికి ట్రస్ట్ ఈ కీలక నిర్ణయం తీసుకుంది.

పరిపాలనలో పారదర్శకత, భద్రత పెంపు

కొత్త సీఈవోగా బాధ్యతలు చేపట్టనున్న జితేంద్ర మిశ్రా ఇకపై నేరుగా ఆలయ ప్రాంగణంలోనే నివసిస్తూ, దైనందిన వ్యవహారాలను ఎప్పటికప్పుడు పర్యవేక్షించనున్నారు. దేశ విదేశాల నుంచి తరలివచ్చే భక్తుల రద్దీని క్రమబద్ధీకరించడం, ప్రస్తుత వ్యవస్థను సమగ్రంగా సమీక్షించడం, ఎలాంటి అవకతవకలకు తావులేకుండా పటిష్టమైన నూతన సంస్కరణలను అమలు చేయడమే లక్ష్యంగా ఆయన ఈ బాధ్యతలు చేపట్టనున్నారు.