భూమికోసం, భుక్తి కోసం, వెట్టి చాకిరి విముక్తి కోసం పోరాడిన తెలంగాణ వీర వనిత చాకలి ఐలమ్మ జయంతి సందర్భంగా, జగిత్యాల చింతకుంట వద్ద ఆమె విగ్రహానికి ప్రజా ప్రతినిధులు, నాయకులతో కలిసి జగిత్యాల శాసనసభ్యులు డాక్టర్ సంజయ్ కుమార్ ఘన నివాళులు అర్పించారు. ఐలమ్మ స్ఫూర్తి నేటి సమాజానికి ఆదర్శమని ఆయన అన్నారు.
జగిత్యాల చింతకుంటలో జరిగిన ఈ కార్యక్రమంలో, శాసనసభ్యులు డాక్టర్ సంజయ్ కుమార్ మాట్లాడుతూ, చాకలి ఐలమ్మ మహిళలలో గొప్ప స్ఫూర్తిని నింపారని కొనియాడారు. భూమి, భుక్తి, వెట్టి చాకిరి విముక్తి కోసం ఆమె చేసిన పోరాటాన్ని గుర్తు చేసుకున్నారు. వెనుకబడిన వర్గాలకు విద్యతోనే సమాజంలో గుర్తింపు సాధ్యమని, ఈ నేపథ్యంలోనే మహిళా విశ్వవిద్యాలయానికి ఐలమ్మ పేరు పెట్టడం జరిగిందని ఆయన తెలిపారు. ఐలమ్మ ఆశయాలకు అనుగుణంగా ప్రతి ఒక్కరూ పనిచేయాలని ఆయన పిలుపునిచ్చారు. ఈ జయంతి కార్యక్రమంలో మున్సిపల్ చైర్ పర్సన్ సావాండ్ల వాణి శ్రీనివాస్, అధ్యక్షులు గజ్జంగి నందయ్య, కమిషనర్ సత్య ప్రణవ్ తదితరులు పాల్గొన్నారు. ఐలమ్మ విగ్రహానికి పూలమాలలు వేసి నివాళులు అర్పించారు.
