కరీంనగర్ జిల్లా మండలంలోని సనుగుల గ్రామంలో ఒక అరుదైన ఘటన చోటుచేసుకుంది. అనారోగ్యంతో ప్రైవేట్ ఆసుపత్రిలో చికిత్స పొందుతున్న చీకటి శంకరయ్య అనే వృద్ధుడు మృతి చెందినట్లు వైద్యులు నిర్ధారించారు. అయితే, అంత్యక్రియల కోసం తరలిస్తుండగా అతడు సజీవంగా లేచి కూర్చోవడం అందరినీ ఆశ్చర్యపరిచింది.
అనారోగ్యంతో బాధపడుతున్న చీకటి శంకరయ్య అనే వృద్ధుడికి శనివారం ఒక ప్రైవేట్ ఆసుపత్రిలో వైద్యులు చికిత్స అందించారు. చికిత్స అనంతరం ఆయన మృతి చెందినట్లు వైద్యులు కుటుంబ సభ్యులకు సమాచారం ఇచ్చారు. దీంతో కుటుంబ సభ్యులు అంత్యక్రియల కోసం మృతదేహాన్ని స్వగ్రామమైన సనుగులకు తరలించేందుకు అంబులెన్స్లో బయలుదేరారు. అయితే, మృతదేహాన్ని తరలిస్తున్న సమయంలో జోగాపూర్ సమీపంలో అకస్మాత్తుగా శంకరయ్య కళ్లు తెరిచి, లేచి కూర్చున్నాడు. ఈ పరిణామంతో కుటుంబ సభ్యులు షాక్కు గురయ్యారు. వెంటనే అతన్ని తిరిగి వేములవాడలోని ప్రైవేట్ ఆసుపత్రికి తరలించారు. అక్కడ వైద్యులు పరీక్షించి, ఆయన ఆరోగ్య పరిస్థితి నిలకడగా ఉందని ధృవీకరించారు. తండ్రి మృతి చెందాడని భావించి గల్ఫ్ నుంచి బయల్దేరిన కుమారులకు ఈ వార్త ఊరటనిచ్చింది. తండ్రి బతికే ఉన్నాడని తెలియడంతో కుటుంబ సభ్యుల్లో ఆనందాశ్చర్యాలు వెల్లివిరిశాయి. ఈ విషయం తెలుసుకున్న గ్రామస్థులు శంకరయ్యను చూసేందుకు భారీగా తరలివచ్చారు.
