హైదరాబాద్: బంజారాహిల్స్ పోలీస్ స్టేషన్లో సబ్-ఇన్స్పెక్టర్గా పనిచేస్తున్న కొట్టూరు విజయ్ అవినీతి నిరోధక శాఖ (ఏసీబీ) అధికారులకు పట్టుబడ్డారు. అధికారిక విధుల నిర్వహణలో అక్రమ ప్రయోజనం పొందేందుకు ప్రయత్నించినందుకు ఆయనపై కేసు నమోదు చేసినట్లు ఏసీబీ అధికారులు తెలిపారు.
బంజారాహిల్స్ పోలీస్ స్టేషన్లో నమోదైన కోర్టు రిఫర్డ్ కేసులకు (క్రైమ్ నెం. 524/2024, 525/2024) సంబంధించి ఒక ఫిర్యాదుదారుడిని అరెస్ట్ చేయకుండా ఉండటానికి, సీఆర్పీసీ సెక్షన్ 41-ఏ కింద నోటీసులు జారీ చేయడానికి మరియు నూతన కేసులు నమోదు కాకుండా చూసేందుకు ఎస్సై విజయ్ సదరు వ్యక్తిని లంచం డిమాండ్ చేశారు. సదరు పని కోసం మొదట రూ. 10,00,000 డిమాండ్ చేయగా, చివరికి రూ. 1,00,000 కు ఒప్పందం కుదిరింది. ఈ క్రమంలో అధికారి అనైతికంగా, స్వార్థపూరితంగా వ్యవహరించారని నిర్ధారణ కావడంతో ఏసీబీ చర్యలు చేపట్టింది.
నిందితుడైన ఎస్సై కొట్టూరు విజయ్ను జ్యుడీషియల్ రిమాండ్ నిమిత్తం నాంపల్లిలోని కేసుల మొదటి అదనపు ప్రత్యేక న్యాయమూర్తి ఎదుట హాజరుపరిచినట్లు ఏసీబీ ఒక ప్రకటనలో తెలిపింది. భద్రతా కారణాల దృష్ట్యా ఫిర్యాదుదారుడి వివరాలను గోప్యంగా ఉంచినట్లు తెలిపారు. ఈ కేసుపై మరింత దర్యాప్తు కొనసాగుతోంది. ఏదైనా ప్రభుత్వ అధికారి లంచం డిమాండ్ చేస్తే వెంటనే ఏసీబీ టోల్ ఫ్రీ నంబర్ 1064 ను సంప్రదించాలని అధికారులు ప్రజలను కోరారు. వీటితో పాటు వాట్సాప్: 9440446106, ఫేస్బుక్: , ఎక్స్ (ట్విట్టర్): మాధ్యమాల ద్వారా కూడా ఏసీబీకి ఫిర్యాదు చేయవచ్చు.
ఫిర్యాదు చేసిన బాధితులు లేదా ఫిర్యాదుదారుల పేర్లు, వివరాలు పూర్తిగా గోప్యంగా ఉంచబడతాయని ఏసీబీ పీఆర్ఓ స్పష్టం చేశారు.
