Khammam/Madhira (ధర్మ రథం) సెప్టెంబర్ 13
హైదరాబాద్లోని ఉప్పల్ భగాయత్లో నిర్మించనున్న ఆర్యవైశ్య ఆత్మగౌరవ భవన సముదాయానికి ముఖ్యమంత్రి ఎ. రేవంత్ రెడ్డి శంకుస్థాపన చేశారు. పేద ఆర్యవైశ్య కుటుంబాల సంక్షేమానికి ప్రభుత్వం అన్ని విధాలా అండగా ఉంటుందని ఆయన భరోసా ఇచ్చారు.
*పేద ఆర్యవైశ్య కుటుంబాల సంక్షేమానికి ప్రజా ప్రభుత్వం అండగా ఉంటుంది: సీఎం రేవంత్ రెడ్డి* హైదరాబాద్: పేద ఆర్యవైశ్య కుటుంబాల సంక్షేమానికి ప్రజా ప్రభుత్వం అన్ని విధాలా అండగా ఉంటుందని ముఖ్యమంత్రి శ్రీ ఎ. రేవంత్ రెడ్డి భరోసా ఇచ్చారు. సమాజంలో సౌమ్యులు, మానవతావాదులుగా ఆర్యవైశ్యులు పేదల విశ్వాసానికి బ్రాండ్ అంబాసిడర్లుగా గొప్ప పాత్ర పోషిస్తున్నారని అన్నారు. హైదరాబాద్లోని ఉప్పల్ భగాయత్లో నిర్మించనున్న ఆర్యవైశ్య ఆత్మగౌరవ భవన సముదాయానికి ముఖ్యమంత్రి శ్రీ ఎ. రేవంత్ రెడ్డి శంకుస్థాపన చేశారు. ఈ కార్యక్రమంలో మంత్రి గడ్డం వివేక్ వెంకటస్వామి, రాజ్యసభ సభ్యులు వేం నరేందర్ రెడ్డి, మాజీ మంత్రి టీజీ వెంకటేష్, పలువురు శాసనసభ్యులు, కార్పొరేషన్ల చైర్మన్లు, ఆర్యవైశ్య సంఘాల ప్రతినిధులు పాల్గొన్నారు. ఈ సందర్భంగా నిర్వహించిన సభలో ముఖ్యమంత్రి మాట్లాడుతూ, ఆర్యవైశ్య ఆత్మగౌరవ భవన నిర్మాణానికి రాష్ట్ర ప్రభుత్వం అన్ని రకాల సహాయ సహకారాలు అందిస్తుందని హామీ ఇచ్చారు. ముఖ్యంగా పేద ఆర్యవైశ్య కుటుంబాల పిల్లలకు ఈ భవనం సంపూర్ణంగా ఉపయోగపడేలా చూడాలని ప్రతినిధులకు సూచించారు. సాధారణ ఆర్యవైశ్య కుటుంబంలో జన్మించిన మహాత్మా గాంధీ ప్రపంచస్థాయి నాయకుడిగా ఎదగడం భారతదేశానికి గర్వకారణమని సీఎం పేర్కొన్నారు. అలాగే ఆంధ్ర రాష్ట్రం కోసం పొట్టి శ్రీరాములు చేసిన ప్రాణత్యాగాన్ని, ఉమ్మడి ఆంధ్రప్రదేశ్‌లో ఆర్థిక మంత్రిగా కొణిజేటి రోశయ్య అందించిన విశేష సేవలను గుర్తుచేశారు. గ్రామీణ ప్రాంతాల్లో పేదలకు సరుకులు అరువుగా ఇచ్చే విషయంలో ఆర్యవైశ్యులు చూపించే మానవతా దృక్పథం అభినందనీయమని సీఎం అన్నారు. ముందుచూపు, జాగ్రత్తగా వ్యవహరించడం ఆర్యవైశ్యులలో సహజంగా ఉంటుందని పేర్కొన్నారు. ఆర్యవైశ్యులంతా ఐక్యంగా, సమైక్యంగా ఒక్కతాటిపై నడిస్తే మరింత బలం చేకూరుతుందని సీఎం రేవంత్ రెడ్డి సూచించారు. ఐక్యతతో రాజకీయాలతో పాటు అన్ని రంగాల్లో తమ వాటాను సాధించుకోవచ్చని అన్నారు. కార్పొరేషన్లు, మున్సిపాలిటీల్లో ఆర్యవైశ్యులకు ప్రాధాన్యత కల్పిస్తున్నామని ఈ సందర్భంగా గుర్తుచేశారు.
