గుజరాత్లోని అహ్మదాబాద్ సబర్మతి రైల్వే స్టేషన్లో దేశంలోనే మొట్టమొదటి లిక్విఫైడ్ నేచురల్ గ్యాస్ (ఎల్ఎన్జి) ఆధారిత రైలును కేంద్ర హోంమంత్రి అమిత్ షా, ముఖ్యమంత్రి భూపేంద్ర పటేల్ జెండా ఊపి ప్రారంభించారు. రూ.1,540 కోట్లకు పైగా విలువైన పలు రైల్వే అభివృద్ధి ప్రాజెక్టులను కూడా వారు జాతికి అంకితం చేశారు.
ఈ ప్రాజెక్టులో భాగంగా, సబర్మతి ఇంటిగ్రేటెడ్ కోచ్ డిపోలో 1,400 హెచ్పి సామర్థ్యం గల రెండు డ్రైవింగ్ పవర్ కార్లను డీజిల్-ఎల్ఎన్జి డ్యూయల్ ఫ్యూయల్ సిస్టమ్గా మార్చారు. ఈ అత్యాధునిక విధానం ద్వారా దాదాపు 40 శాతం వరకు డీజిల్ వినియోగం తగ్గి, ఎల్ఎన్జి ప్రత్యామ్నాయ ఇంధనంగా ఉపయోగపడుతుంది. ఒక్కో పవర్ కార్లో 2,200 లీటర్ల సామర్థ్యం గల ఎల్ఎన్జీ ట్యాంక్ను అమర్చారు. ఇది సుమారు 444 కిలోమీటర్ల దూరం నిరంతరంగా ప్రయాణించే వెసులుబాటు కల్పిస్తుంది. ఈ సరికొత్త సాంకేతికత వల్ల గాలిలో కాలుష్యాన్ని కలిపే కర్బన ఉద్గారాలు గణనీయంగా తగ్గడంతో పాటు, డీజిల్ ఖర్చులు కూడా భారీగా ఆదా కానున్నాయి. దీనివల్ల ఏడాదికి దాదాపు రూ. 23.9 లక్షల వరకు ఆర్థిక ప్రయోజనం చేకూరుతుందని అంచనా వేశారు. ఈ సందర్భంగా అమిత్ షా మాట్లాడుతూ, ప్రధాని మోదీ నాయకత్వంలో దేశంలో రైల్వే విద్యుద్దీకరణ 99.6 శాతానికి చేరిందని, డీజిల్ వినియోగం గణనీయంగా తగ్గిందని తెలిపారు. కవచ్ స్వదేశీ రక్షణ వ్యవస్థ, డబ్ల్యూఏజీ-12 లోకోమోటివ్ మెయింటెనెన్స్ షెడ్ వంటి ప్రతిష్టాత్మక ప్రాజెక్టులతో రైల్వే రంగం అపూర్వమైన ప్రగతిని సాధిస్తోందని ఆయన కొనియాడారు.
