ఇంటర్ విద్య తొలగింపుపై కవిత ఆగ్రహం: తుగ్లక్ తో సీఎం పోలిక

ఇంటర్మీడియేట్ విద్య మనకు అవసరమని, దాన్ని అందరం కాపాడుకోవాలని కవిత పిలుపునిచ్చారు. ముఖ్యమంత్రి ప్రకటనలు చూస్తుంటే తుగ్లక్ కూడా సిగ్గుపడతాడని, ఆయన సడెన్గా ఒక మీటింగ్లో ఇంటర్మీడియేట్ ప్రవేశాలు ఈ ఏడాది నుంచి తీసుకోమని అంటారని, రెండు రోజుల్లో ఇంటర్ అడ్మిషన్లు అంటూ ఇంటర్మీడియేట్ బోర్డు ప్రకటనలు చేస్తుందని విమర్శించారు. గతంలో పిచ్చి పనులు చేసే పాలకుడిని తుగ్లక్ అనేవారని, కానీ ఇక నుంచి రేవంత్ రెడ్డి అనాల్సి వస్తుందని అన్నారు. ముఖ్యమంత్రి పదవికి డిగ్నిటీ ఉంటుందని, ఆ డిగ్నిటీని కాపాడాలని సూచించారు.

ఇలాంటి విధానపరమైన నిర్ణయాలు తీసుకునే ముందు మేధావులు, సబ్జెక్ట్ నిపుణులతో చర్చించాలని, లేదంటే ఆ నిర్ణయాలు బెడిసి కొడతాయని కవిత అన్నారు. ఇంటర్ విద్యను తీసేయడం వల్ల ఆడపిల్లలు చదువుకు దూరమవుతారని, ఫీజు రీయింబర్స్ మెంట్ బకాయిల కారణంగానూ ఆడపిల్లలే చదువుకు దూరమవుతున్నారని తెలిపారు. ఆడపిల్లల చదువు విషయంలో ప్రతి అంశం లింక్ అయి ఉంటుందని, బస్సు లేకపోయినా ఆడపిల్లలను చదువుకు దూరం చేస్తారని, అందుకే ఫీజు రీయింబర్స్ మెంట్ చెల్లించాలని, విద్య విషయంలో ఆడపిల్లలకు ఇబ్బంది అయ్యే నిర్ణయాలు తీసుకోవద్దని కోరారు.

ఆంధ్రా, తెలంగాణ విషయంలో తాను చాలా కచ్చితంగా ఉంటానని, ఈ ముఖ్యమంత్రి విద్యా కమిషన్ పేరుతో ఆంధ్రా వ్యక్తి ఆకునూరి మురళిని ఛైర్మన్గా వేసినప్పుడే తనకు డౌట్ వచ్చిందని కవిత తెలిపారు. కానీ విద్యకు సంబంధించి కమిషన్ కనుక గౌరవించామని, అయితే ఆ కమిషన్ మూడేళ్ల పాటు టైమ్ వేస్ట్ చేసి మూడు సిఫారసులు చేసిందని విమర్శించారు. ఇంటర్మీడియేట్ పాస్ పర్సెంటేజీ 45 శాతం చేయాలని సూచించిందని, అది జరిగే పనేనా అని ప్రశ్నించారు. రేవంత్ రెడ్డి ప్రభుత్వం శాతం ఓట్లతో అధికారంలోకి వచ్చిందా కాదా అదే రూల్ ఈ ప్రభుత్వానికి అప్లయ్ చేస్తే రేవంత్ రెడ్డి సీఎంగానే ఉండొద్దని అన్నారు.

ఇంటర్మీడియేట్ లో ఫస్ట్ ఇయర్ ఎగ్జామ్ ఉండవద్దని సూచించారని, కానీ ప్రతి విద్యార్థికి ఒక చెక్ పాయింట్ అనేది ఉండాలని కవిత అన్నారు. ఇక ఇంటర్మీడియేట్ లో వెయిటేజ్ అంటారని, అది టెస్ట్ డ్, ట్రెయిన్డ్, ఫెయిల్డ్ నిర్ణయం అని, గతంలో ఈ విధానం వద్దనుకుంటే మళ్లీ అదే పాత విధానాన్ని ఈ కమిషన్ తీసుకురావాలని చెప్పిందని తెలిపారు. ముఖ్యమంత్రి ఏమో ఈ కమిషన్ నివేదికను చెత్తబుట్టలో వేస్తా అంటాడని, అలాంటప్పుడు కమిషన్ వేయటం దేనికి టైమ్ వేస్ట్ చేయటం దేనికి అని ప్రశ్నించారు.

ఇప్పుడు మళ్లీ కేకే కమిషన్ అంటున్నారని, ఇప్పటికే మూడేళ్లు టైమ్ వేస్ట్ చేశారని, కేకే కమిషన్ రిపోర్ట్ ఎప్పుడు ఇస్తుంది దాన్ని మీరెప్పుడు అమలు చేస్తారు అని కవిత ప్రశ్నించారు. మన ఇంటర్మీడియేట్ విద్య దేశంలోనే నంబర్ వన్ గా ఉందని, దాన్ని ఇంకా బలోపేతం చేయాలని, మంచిగా ఉన్న సిస్టమ్ మార్చటానికి ఇదేమీ కాంగ్రెస్ పార్టీ కాదని అన్నారు. మీ నిర్ణయాలు చూస్తుంటే మీరు నడిపేది సర్కారా సర్కస్ అని ప్రజలు అనుకుంటున్నారని ఎద్దేవా చేశారు.

ఈ రాష్ట్రంలో ఫ్రీ ఎడ్యుకేషన్ ఉండాలని తాను గట్టిగా కోరుకుంటున్నానని, కానీ చాలామంది బడ్జెట్ సరిపోతుందా అని అంటున్నారని, ఇంత తుగ్లక్ ప్రభుత్వంలోనూ మనకు 2 లక్షల కోట్లు ఏటా ఆదాయం వస్తుందని, అందులో లక్ష కోట్లను విద్య, వైద్యానికి కేటాయించవచ్చని కవిత తెలిపారు. ప్రపంచం తిరిగి, ఎన్నో కమిటీల్లో పనిచేసిన అనుభవంతో ఇది సాధ్యమేనని తెలుసుకున్న తర్వాతే చెబుతున్నానని, కచ్చితంగా ఉచిత విద్య, వైద్యం ఇవ్వవచ్చని, అందుకు ఉండాల్సింది పొలిటికల్ విల్ పవర్ మాత్రమేనని అన్నారు.

విద్య, వైద్యం కోసమే ప్రజలు తమ ఆదాయంలో 70 శాతం ఖర్చు చేస్తున్నారని, ప్రభుత్వమే వాటిని ఫ్రీ గా ఇస్తే ఆ ఆదాయంతో వాళ్ల జీవితాలు ఎంతో మెరుగు అవుతాయని కవిత అన్నారు. ఇంటర్మీడియేట్ విద్యతో పెట్టుకోవాలని ఆలోచన చేస్తే విద్యార్థుల తల్లితండ్రులతో, కొరివితో తలగొక్కున్నట్టేనని, కచ్చితంగా వాళ్లంతా మీ ప్రభుత్వాన్ని పడగొట్టటం ఖాయమని హెచ్చరించారు.

ఇంటర్మీడియేట్ విద్యను తీసేయాలన్న ముఖ్యమంత్రి ఈ ఏడాదికి వాయిదా వేస్తున్నామని చెబుతున్నారని, కానీ ఈ అసెంబ్లీ సమావేశాల్లోనే ఇంటర్ విద్యను తీసేయమని ఆయన హామీ ఇవ్వాలని కవిత డిమాండ్ చేశారు. లేదంటే తెలంగాణ రక్షణ సేనగా తాము ఊరుకోమని, ప్రభుత్వ నిర్ణయం మారే వరకు పోరాటం చేస్తామని స్పష్టం చేశారు.